-------- "This is the time for action not only words, use your God given gifts to develop this country, dont be afraid to speak up, and feel PROUD THAT U R EGYPTIAN." -------- Mohaly, Feb 2011

Monday, March 5, 2012

812) Ya Wad Ya Mo2men !!

يعنى إيه متدين؟
أيوه أنا عايز أفهم؟
يعنى بيصلى و بيصوم و بيزكى و يحفظ قران؟ 
و لا بيحترم الناس و عادل و كريم و طيب و بيتقى ربنا؟
و لا اللى بينجح إنه يقنع الناس إنه متدين؟
و لا اللى وشه سمح و يريح و عليه علامات التقوى؟
و لا اللى مطول دقنة و حالق شنبه و عنده زبيبة و رافع بنطلونه؟
و لا اللى بيدخل لفظ الجلالة بين كل كلمة و التانية؟
و لا اللى بيقضى حاجات الناس لوجه الله؟
و لا اللى بيمنع الأذى عن الناس و يقف جنبهم ضد الظلم؟
و لا العضو فى جماعة أو حزب دينى؟

طب مين اللى يقرر إنك متدين؟
إنت؟
أهلك؟
أصحابك؟
حزبك؟
إستفتاء؟

طب لو إنت متدين ده بيديك أى حقوق أو مميزات زيادة؟

طب لو أنا متدين و إنت متدين و إختلفنا فى الرأى .. كلام مين فينا اللى يمشى؟

طب لو إنت متدين و الناس متفقه على ده ... بس كذبت و نافقت و ظلمت و.. و.. تبقى إيه؟

طب لو أنا بصلى و أصوم و أزكى و بأتقى ربنا فى رزقى و شغلى و أهلى بس بؤمن بأفكار حرة (ليبرالية) أبقى إيه؟


الإيمان هو ما وقر فى القلب وصدقه العمل،
 قال تعالى: "قالت الأعراب أمنا قل لم تؤمنوا ولكن قولوا أسلمنا ولما يدخل الإيمان فى قلوبكم".
الإيمان قول وعمل.

و لا إيه يا واد يا مؤمن؟

Mohaly

9 comments:

Sarkozayas said...

الدين يا دكتور معاملات + عبادات وقال رسول الله صلى الله عليه وسلم انما الاعمال بالنيات ولكل امرء مانوى فمن كانت هجرتهإلى الله ورسوله ، فهجرته إلى الله ورسوله ، ومن كانت هجرته لدنيا يصيبها ، أو امرأة ينكحها ، فهجرته إلى ماهاجرإليه

Yasmin Sobhy said...

أعجبنى جدا طريقه عرض التساؤلات . أما بالنسبه للمضمون اهم شىء هو اخلاص النيه و تجديدها. كل ما سبق ( المظهر , المعاملات ) يطلق على صاحبه متدين إذا أخلص النيه .أما من طلبوا الدنيا بعمل الاخره لا يقبل منهم (طلق اللحيه لكى يطلق عليه انه متدين .........)
كما قال الرسول صلى الله عليه وسلم عن الغازى و الجواد و العالم . فهم طلبوا عمل الاخره فى الدنيا فكلهم فى النار لانه قيل لهم فى الدنيا ما أرادوا فليس لهم فى الاخره من نصيب .
الحكم على الاشخاص يكون من الظاهر ليس المظهر وحده و لكن السلوكيات و المعاملات أما باطن الامور لا يعلمها الا الله ...
عندالاختلاف مرجعنا الى الله و رسوله
الايمان قول و عمل و اعتقاد...

Names said...
This comment has been removed by the author.
Names said...

مش كل اللي بيصلي ويصوم ويزكي متدين ومش كل اللي بيحضر او يسمع او يعطي دروس دينية متدين ومش كل اللي بيقصر هدومه ويربي دقنه متدين ومش كل منقبه ومحجبه متدينه!!
مشكلة الغالبيه العظمي في مجتمعنا انهم بيحكموا على الناس من الظاهر منهم ومن التزامهم بالعبادات الظاهره ومن مظاهرهم الخارجيه ومن كتر كلامهم عن نفسهم ومن كتر ما الناس بتمدح فيهم لهم لدرجه تصل الى العبوديه في بعض الاحيان.
أعتقد أن علاقة كل واحد مننا بربه هي علاقه لا يعلمها الا هو رب العالمين ....الايمان محله القلب , احنا كبشر ما نقدرش نحدد مين مننا أكتر ايمان او التزام او تدين وفقا للالتزام بالعبادات ووفقا للمظهر الخارجي والسلوك العام , ياما اشخاص مظهرهم لايعكس ما بداخلهم , ياما بنشوف مظاهر خداعه , وكتير منافقين وممثلين بياخدوا الدين غطاء ووسيلة لامور دنيوية ولمصالح شخصيه ومادية و بيستغلوه عشان يوصلوا للسلطة والسيطرة على الاخرين وده زي ما احنا شايفينه بيحصل دلوقتي.
زي ما فيه مثل بيقول ( من بره هالله هالله ومن جوه يعلم الله).
تدين الانسان ومدى ايمانه ومدى قيامه يكون بعمل الطاعات ومدى قربه من الله , عشان كده مش ينفع ان اي واحد يحكم على اي حد ويحدد مدى ايمانه , لانه لا يعلم الغيب ولا يعلم مافي القلوب الا الله عزوجل .... ربنا اعلم بعباده واعلم من منهم اكثر التزام ومن اقوى ايمان ومش احنا اللي نحدد و نحكم على مدى التزام الاخرين. وعجبي من اللي بيحصل اليومين دول!!!!!
فيه مقوله بتقول " دع الخلق للخالق و دع الحكم على الخلق للخالق"
قال رسول الله صلى الله عليه وسلم "إن الرجل يصبح مؤمنا حتى ما يكون بينه وبين الجنة ذراعا حتى يسبق عليه القلم فيعمل بعمل أهل النار فيدخلها، وأن الرجل يمسي كافراً حتى ما يكون بينه وبين النار إلا ذراعاً فيسبق عليه القلم فيعمل بعمل أهل الجنة فيدخلها" فقلوب البشر بيد بارئها يقلبها كيف يشاء. و الجزاء من جنس العمل والذي يجازي العباد على أفعالهم هو ربهم ، وليس بشرا مثلهم.

Anonymous said...

المتدين كما جاء في الوصف الدقيق له: استقرار الايمان بالله في القلب و تصديق الجوارح لهذا الايمان.
بس كده.
لو طبقت هذا المقياس سوف تجد الاجابة على كل أسئلتك.
أرجو الا أكون متطفلة على المدونة بتاعت حضرتك.

Mohaly said...

متطفلة!!!!!

Anonymous said...

الحقيقة يا دكتور محمد جالي الاحساس ده لما لقيت حضرتك معلقتش أو رديت على كتاباتي اللاخيريتين. كنت نويت أبطل علشان يعني منعا للأحراج، بس حسيت ان يمكن ردي على هذا البوست يجاوب على أسئلة كثيرة عندك يمكن تكون فعلا محيراك.

Mohaly said...

khales, sometimes I dont find something to add to what was said.. This blog has always been welcoming and will always be.

Sohad said...

اللإيمان والدين ما وقر في القلب ودي مش حاجة بسيطة ولا بنحسها كل يوم. النهاردة عرفت معني اننا نحب ربنا بجد وبالتالي تلقائياًنحب نفسنا والآخرين
الدين والتدين مش بأداء العبادات هي بمعناها وأثرها واحنا بنعملها لسه! محدش يقدر يحكم علي حد لأن علاقة الإنسان بربه وقصدي هنا العلاقة الحقيقية هتفضل بين الإنسان وربه مفيهاش طرف تالت فلم نشقق عن صدر أحد. ولكن يبقي بعض صفات المؤمنين في تصرفاتهم ووجوههم..