-------- "This is the time for action not only words, use your God given gifts to develop this country, dont be afraid to speak up, and feel PROUD THAT U R EGYPTIAN." -------- Mohaly, Feb 2011

Sunday, June 1, 2014

863) خناقة كافية !

مرة فى يوم مش فاكر إيه
عزمت عقلى و قلبى ع الكافية
و بعد ما عرفتهم على بعض ..
سابونى أنا و مسكوا فى بعض

عقلى يقوله تحب ليه 
و قلبى قاعد يضحك عليه
بيقوله أمال عايش ليه ..
و حياتك دى بتعمل بيها إيه

عقلى إتزرزر و عمل منظر
و كان هايلم الخلق عليه
قاله حياتى هى نجاحى ..
فى شغلى و إسمى و مالى يا بيه

قلبى زغرله و قاملوه و قالوه
إنت بجد مصدق نفسك
هى أشغالك على نجاحاتك ..
فى لحظة حب بتساوى إيه

عقلى بكى و جالى إشتكى
إن قلبى بيقسى عليه
و أنا من طيبتى أو من خيبتى ..
مش عارف أعمل فيهم إيه

عقلى بيكبر و قلبى بيضغر
و عاملين خناقة مع بعض
و أنا بتفرج و ساعات أهرج ..
و لا طايل و لا سما و لا أرض

M.O.H.@.L.Y
يونيو 2014

14 comments:

Laila said...

try to compromise.

Mohaly said...

and how is that?
They are not giving me any space ..

Mohaly said...

in addition I hate this word .. Compromise ... it is reaching a solution that no one wants from the beginning.

قعده شاي بالنعناع said...

تحفه بجد
اكملهالك :
شكلي في الاخر حسيبهم مع بعض
يتصالحوا بقه او يخلصوا علي بعض،
واكمل انا حياتي بالطول والعرض

Mohaly said...

looool

لو خلصوا على بعض أنا هاعيش من غيرهم إزاى :(

Asmaa Rabia said...

It's amazing

Maryam said...

فكرتني بصورة بحبها قوي صاحبتي دايما تبعتها لي: القلب متعور في كل حتة وحاطط بﻻستر على الجروح وواقف مسنود على عكاز والعقل عمال يشخط فيه ويقول له وبعدين؟ اعقل بقى وارحمني.
يوما ما هايصتلحوا ويتفقوا لما تبقى السكة اللي انت ماشي فيها صح.
طول ما هم بيتخانقوا اعرف ان دي عﻻمة ان السكة دي غلط :-)
الخناقات دي عادية جدااااااااااا. :-) :-) :-)

قعده شاي بالنعناع said...

يا دكتور القافيه حكمت !! وبعدين العلم اتقدم وبقه فيه قطع غيار

AlShaimaa Elkholy said...

سيظل هذا الصراع ... فالحلول الوسط لا ترضى من استمع الى قلبه و ارتضى عقله كوسيله للحكم .... انصحك ونفسى بالهيام .... الهيام فى الكون وذراته .. لعله يشفى النفس العليله

Mohaly said...

هيام أكتر كن كده... انا قربت اوصل زحل

Names said...

الغلطة من البداية اننا بنعرفهم على بعض اصلا....لو كل واحد منهم ركز في شغله بس وما تدخلش في أمور التاني مش هنشوف الصراع ده :-) ... بس لازم يفهموا من البداية أن كل واحد منهم لازم يتحمل نتيجة قراراته وتصرفاته.

Mohaly said...

ما ينفعش كنت أسيبهم كل واحد لوحدة أكتر من كده ... أنا بقى عندى إنفصام فى الشخصية

AlShaimaa Elkholy said...

زحل جميل .... شكله حتى عاطفى :)

Names said...

كل سنة وانتم طيبين يا أهل البلوج الكرام .. رمضان كريم :)